सत्ताका लागि सिद्धान्त बेच्दैनौं, तीन दलको सरकारमा कांग्रेस छैन : थापा

ललितपुर, साउन ३ – नेपाली कांग्रेसका महामन्त्री गगनकुमार थापाले प्रदेश सरकार गठनका लागि तीन ठूला दलबीच भइरहेको सहकार्यको प्रस्तावप्रति कांग्रेसको असहमति रहेको बताएका छन्। उनले यस्तो व्यवस्था लागू भए प्रदेशसभामा प्रभावकारी प्रतिपक्ष नै नरहने भएकाले लोकतान्त्रिक अभ्यास कमजोर हुने धारणा व्यक्त गरे।

ललितपुरमा आयोजित सन्त नेता कृष्णप्रसाद भट्टराईको सालिक अनावरण तथा ४४औँ बीपी स्मृति सप्ताहको उद्घाटन कार्यक्रममा सम्बोधन गर्दै थापाले सत्ता प्राप्तिका लागि सिद्धान्त त्याग्ने राजनीति अब स्वीकार्य नहुने बताए। उनले कांग्रेसले विगतका कमजोरीबाट शिक्षा लिँदै अब मूल्य र मान्यतामा आधारित राजनीति अघि बढाउने प्रतिबद्धता जनाए।

उनका अनुसार विगत केही वर्षदेखि सरकार गठन र सत्ता समीकरणमा देखिएको अस्थिरताले जनविश्वासमा नकारात्मक असर परेको छ। सत्ता परिवर्तनको खेलमा सरकार र प्रतिपक्षको भूमिका पटक–पटक फेरिने प्रवृत्तिले लोकतान्त्रिक प्रणाली नै कमजोर बनेको उनको भनाइ थियो।

महामन्त्री थापाले चुनावी जनादेशको सम्मान गर्नु सबै राजनीतिक दलको दायित्व भएको उल्लेख गर्दै सरकार बनाउने नाममा प्रतिपक्षलाई समाप्त गर्ने कुनै पनि अभ्यास उचित नहुने बताए। उनले कांग्रेस सत्ता साझेदारीभन्दा लोकतान्त्रिक मूल्य, जनताको विश्वास र राजनीतिक सिद्धान्तलाई प्राथमिकता दिने स्पष्ट पारे।

उनले अब राजनीतिक दलहरूले क्षणिक सत्ताभन्दा दीर्घकालीन राजनीतिक विश्वासलाई महत्व दिनुपर्ने आवश्यकता औँल्याउँदै जनताको अपेक्षाअनुसार जिम्मेवार र पारदर्शी राजनीति गर्नुपर्नेमा जोड दिए। कांग्रेसले प्रदेश सरकार गठनका हरेक निर्णयमा यही सिद्धान्तलाई आधार बनाउने उनको भनाइ थियो।