अभिनेता विपिन कार्की रास्वपाको हस्ताक्षर अभियानमा सहभागी

काठमाडौँ, असार ८- राष्ट्रिय स्वतन्त्र पार्टी (रास्वपा) ले पार्टी सभापति रवि लामिछानेको समर्थनमा सञ्चालन गरेको हस्ताक्षर अभियानमा नेपाली चलचित्र क्षेत्रका चर्चित अभिनेता विपिन कार्की सहभागी भएका छन्।

सहकारी ठगी प्रकरणमा मुछिएर हाल रुपन्देही जिल्ला प्रहरी कार्यालयको हिरासतमा रहेका लामिछानेको पक्षमा रास्वपाले असार ७ गतेदेखि देशव्यापी हस्ताक्षर सङ्कलन अभियान सुरु गरेको हो। पार्टीले यस अभियानलाई ‘राजनीतिक प्रतिशोध’ विरुद्धको अभियान भन्दै अगाडि बढाएको छ।

रास्वपाका कोषाध्यक्ष दीपक बोहराका अनुसार आइतबार (असार ८) अभिनेता कार्की पार्टीको मुख्यालय, वनस्थली च:मति पुगेर हस्ताक्षर गरेका हुन्। कार्कीको सहभागितालाई पार्टीले उत्साहजनक समर्थनको रूपमा लिएको जनाएको छ।

यसै अवसरमा, रास्वपाको तेस्रो स्थापना दिवसको अवसरमा सभापति लामिछानेले शनिबार (असार ७) एक २० पृष्ठको दस्तावेज सार्वजनिक गरेका थिए। उक्त दस्तावेजमा हस्ताक्षर अभियानसहित वर्तमान परिस्थितिका बारेमा विस्तृत विवरण दिइएको छ।

पूर्व उपप्रधान तथा गृहमन्त्रीसमेत रहेका लामिछानेमाथि सम्पत्ति शुद्धीकरण, संगठित अपराध र ठगीसम्बन्धी आरोप लागेका छन्। हिरासतमै रहेका उनले दस्तावेजमार्फत जनसमर्थनको अपिल गरेका छन्।