शेख हसिनालाई अदालतको अवहेलनाको आरोपमा ६ महिनाको जेल सजाय

ढाका, असार १८ – बङ्गलादेशकी पूर्वप्रधानमन्त्री शेख हसिनालाई अदालतको अवहेलना गरेको अभियोगमा ६ महिनाको जेल सजाय सुनाइएको छ। बुधबार अदालतले हसिनालाई दोषी ठहर गर्दै उक्त सजाय तोकेको हो।

७७ वर्षीया हसिना सन् २०२४ को अगष्टमा विद्यार्थी नेतृत्वको विद्रोह उत्कर्षमा पुगेपछि भारत पलायन गरेकी थिइन्। अदालतले उनी ढाका फर्कनुपर्ने आदेश दिएको भए पनि उनले आदेशको अवज्ञा गरेकी थिइन्।

मुख्य अभियोजक मोहम्मद ताजुल इस्लामले अदालतको फैसलापछि पत्रकारहरूसँग कुरा गर्दै भने, “उहाँ बङ्गलादेश पुगेको दिन वा अदालतमा आत्मसमर्पण गरेकै दिनदेखि सजाय भुक्तान गर्नुहुनेछ।”

अभियोगअनुसार, पूर्वप्रधानमन्त्री हसिनाले सत्ताबाट हटाइएपछि दिएका केही टिप्पणीहरूबाट साक्षीहरू धम्कीमा परेको र अदालतको कार्यमा असर परेको जनाइएको छ। अभियोजन पक्षले उनका कथित धम्कीपूर्ण भनाइहरू साक्षीहरू र मुद्दा दायर गर्नेहरूमाथि डर सिर्जना गर्ने उद्देश्यले गरिएको दाबी गरेको छ।

सोही मुद्दामा प्रतिबन्धित अवामी लिगका देशबाहिर रहेका नेता शकिल अकाण्डा बुलबुललाई पनि अदालतले दुई महिनाको जेल सजाय सुनाएको छ।

संयुक्त राष्ट्रसङ्घका अनुसार, सन् २०२४ को जुलाईदेखि अगष्टसम्म हसिनाको सरकारले विरोध प्रदर्शन दबाउन दिएको आदेशपछि झन्डै १,४०० जनाको मृत्यु भएको थियो।

जुन १ देखि सुरु भएको अर्को सुनुवाइमा अभियोजन पक्षले हसिनामाथि हिंसात्मक कारबाहीको नेतृत्व गरेको र मानवताविरुद्धको अपराधमा संलग्न रहेको आरोप लगाएको छ। तर हसिनाका सरकारी वकिलहरूले यी सबै आरोपहरू अस्वीकार गरेका छन्।