रुपन्देही–३ : उम्मेदवार घोषणा अघि आकांक्षीहरूको नख्खु कारागारमा दौडधुप

काठमाडौं, भदौ १५ – रुपन्देही–३ को उपनिर्वाचनलाई लक्षित गर्दै राष्ट्रिय स्वतन्त्र पार्टी (रास्वपा)का उम्मेदवार आकांक्षीहरूले आइतबार पार्टी सभापति रवि लामिछानेलाई भेटेका छन्।

सहकारी ठगी मुद्दामा पुर्पक्षका लागि थुनामा रहेका लामिछानेलाई केही दिनअघि मात्र भैरहवाबाट ललितपुरको नख्खु कारागार सारिएको हो। पार्टीले उम्मेदवार घोषणा गर्नुअघि आकांक्षीहरू सभापतिसँग सम्पर्कमा पुगेका हुन्।

आजै बस्ने सचिवालय बैठकमार्फत रास्वपाले उम्मेदवारको नाम सार्वजनिक गर्ने तयारी गरेको छ। बैठकअघि भएको आकांक्षीहरूको भेटलाई अन्तिम सिफारिसमा प्रभाव पार्ने संकेतका रूपमा हेरिएको छ।

उपनिर्वाचनका लागि ९ जना आकांक्षी छन्। तिनमा केन्द्रीय सदस्य कुसुम महर्जन, क्षेत्रीय सभापति मधु अर्याल, अमेरिकाबाट फर्किएका सुलभ खरेल, पार्थिवेन्द्र उपाध्याय, डा. लेखजंग थापा, ज्ञानु पौडेल, जीतबहादुर गुप्ता, रचना क्षेत्री र पुनम अग्रवाल छन्।

कुसुम, मधु, सुलभ र जीतबहादुर बाहेकका पाँच जना आकांक्षी भैरहवाका स्थानीय हुन्।

रुपन्देही–३ का प्रतिनिधि दीपक बोहराको निधनपछि निर्वाचन आयोगले कात्तिक १७ गते उपनिर्वाचन गर्ने मिति तोकेको छ।