इसराइली हवाई आक्रमणमा यमनका प्रधानमन्त्री मारिएको दाबी

काठमाडौँ, भदौ १५ – यमनको राजधानी सानामा बिहीबार भएको इसराइली हवाई आक्रमणमा प्रधानमन्त्री अहमद गालिब अल रहाबी मारिएको दाबी हुथी विद्रोहीहरूले गरेका छन्।

हुथी राजनीतिक परिषद्का प्रमुख महदी अल मशातले भिडियो सन्देशमार्फत प्रधानमन्त्री गालिबको मृत्यु भएको पुष्टि गर्दै आक्रमणको प्रतिशोध लिने चेतावनी दिएका छन्। उनले सहिद र घाइतेका परिवारलाई विजयमा रूपान्तरण हुने आश्वासन पनि दिएका छन्।

हुथी नियन्त्रणमा रहेको टेलिभिजन च्यानलले पनि आक्रमणमा प्रधानमन्त्री अल रहाबी मारिएको र उनका केही मन्त्री गम्भीर घाइते भएको समाचार प्रसारण गरेको छ। यद्यपि यसबारे स्वतन्त्र पुष्टि भइसकेको छैन।

इसराइली रक्षामन्त्री इसराइल कात्जले विज्ञप्ति जारी गर्दै हुथी नेतृत्वलाई लक्षित गर्दै गरिएको कारबाहीमा प्रधानमन्त्रीसहित अधिकांश मन्त्री र अन्य उच्च अधिकारीहरूलाई समाप्त गरिएको दाबी गरेका छन्।

आक्रमणका बेला प्रधानमन्त्रीसहित सरकारका वरिष्ठ अधिकारी वार्षिक कार्य मूल्याङ्कन बैठकमा सहभागी रहेको र सोही अवसरलाई इसराइलले निशाना बनाएको हुथी पक्षको आरोप छ।

यस पटकको आक्रमणमा राष्ट्रपति भवननजिकै रहेको सैन्य आधार, दुईवटा विद्युत केन्द्र र इन्धन भण्डारण केन्द्र पनि क्षतिग्रस्त भएको बताइएको छ।

गजामा युद्ध सुरु भएको करिब दुई वर्षयता इसराइलले इरान समर्थित समूहका शीर्ष नेताहरूमाथि लगातार लक्षित आक्रमण गर्दै आएको छ। यसअघि तेहरानमा हमास नेता इस्माइल हानियाह, बेरुतमा हिजबुल्लाह प्रमुख हसन नसरल्लाह र गजामा हमास नेता यह्या सिनवारसहित उनका दाजु मोहम्मद सिनवार इसराइली आक्रमणमा मारिएका थिए।

हुथी विद्रोहीहरूले भने हालैका दिनमा गाजामा जारी युद्धप्रति समर्थन जनाउँदै रातो सागर क्षेत्रमा अमेरिकी तथा इसराइली जहाजहरूलाई लक्ष्य गर्ने कार्य तीव्र पारेका छन्।